thi kal dayaar-e-'ishq mein 'iduzzuhaa 'miraash' — Miraash

ghar palaT kar jo miri raushan-khayaali aai hai
shor hai shahr-e-sukhan mein phir divaali aai hai

jo mere banne se pahle ik intizaar banaa
us intizaar ke andar main baar baar banaa

khanak rahaa huun main nashshe mein chaabiyon ki tarah
khuli hai pyaas magar mai-kade pe taalaa hai

kis gardish-e-paiham mein miraa sho’la-e-dil hai
jaltaa hai lahu roghan-e-khurshid ki surat

khutut aag mein jalte hain aur sikhon par
kisi kaa dil to jigar hai kisi parinde kaa

gard aainon ki chaaron taraf hai jami hui
'aalam 'ajib shisha-gari ki dukaan hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ishq ki raahon mein aayaa hai ik aisaa bhi maqaam
sirf ik main huun vahaan ahl-e-zamin koi nahin

kahin raanjhaa, kahin majnun huaa
vajud-e-ishq aalamgir hai

jo hain mast-e-alast un ko khumaar-o-sukr kaa Dar kyaa
nigaah-e-tishna-kaam-e-ishq hi dast-e-mughaan tak hai

hai shaikh-o-barahman ke diin ki had dair-o-kaaba tak
savaad-e-din-e-ishq-e-be-gharaz kaun-o-makaan tak hai