sadaa-e-qulqul-e-minaa mujhe nahin aati — Mirza Maseeta Beg Muntahi

khud rahm kijiye dil-e-ummid-vaar par
aaphi nikaaliye koi surat nibaah ki

tere baazaar-e-dahr mein gardun
ham bhi aae hain ik qabaa ke liye

jalaa kar zaahidon ko mai-kashon ko shaad karte hain
giraa kar masjidon ko mai-kade aabaad karte hain

piiri hui shabaab se utraa jhaTak gayaa
shaaer huun meraa misra-e-saani laTak gayaa

baad marne ke Thikaane lag gai miTTi miri
khaak se aashiq ki kyaa kyaa yaar ke saaghar bane

tohmat-e-jurm-o-khataa hirs-o-havaa ghaflat-e-dil
ham ne baazaar se hasti ke liyaa kyaa kyaa kuchh

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

lahu na ho to qalam tarjumaan nahin hotaa
hamaare daur mein aansu zabaan nahin hotaa

ruh-o-badan mein jaari hai ik maarka-e-khun sadiyon se
ek havaala miTTi kaa hai ek havaala paani kaa

dil dard se khaali nahin ik lamha kisi taur
ye baat magar dil ke sivaa kaun kahegaa