rahne de apni bandagi zaahid — Mubarak Azimabadi

kuchh is andaaz se sayyaad ne aazaad kiyaa
jo chale chhuT ke qafas se vo giraftaar chale

tiri adaa ki qasam hai tiri adaa ke sivaa
pasand aur kisi ki hamein adaa na hui

tum ko samjhaae 'mubaarak' koi kyunkar afsos
tum to rone lage yaar aur bhi samjhaane se

miri khaak bhi uDegi baa-adab tiri gali mein
tire aastaan se unchaa na miraa ghubaar hogaa

jabin par khaak hai ye kis ke dar ki
balaaein le rahaa huun apne sar ki

dil lagaate hi to kah deti hain aankhein sab kuchh
aise kaamon ke bhi aaghaaz kahin chhupte hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mujh se baatein karo mohabbat ki
taalib-e-'ilm huun main urdu kaa

ishq tu bhi zaraa Tikaa le kamar
dil bhi ab so gayaa hai raat gae

shaghl behtar hai ishq-baazi kaa
kyaa haqiqi o kyaa majaazi kaa

ye ishq ke khutut bhi kitne ajiib hain
aankhein vo paDh rahi hain jo tahrir bhi nahin