dil ek aur hazaar aazmaaishein gham ki — Mushfiq Khwaja

bujhe hue dar-o-divaar dekhne vaalo
use bhi dekho jo ik umr yaan guzaar gayaa

ye haal hai mire divaar-o-dar ki vahshat kaa
ki mere hote hue bhi makaan khaali hai

nazar churaa ke vo guzraa qarib se lekin
nazar bachaa ke mujhe dekhtaa bhi jaataa thaa

hazaar baar khud apne makaan pe dastak di
ik ehtimaal mein jaise ki main hi andar thaa

miri nazar mein gae mausamon ke rang bhi hain
jo aane vaale hain un mausamon se Darnaa kyaa

ye lamha lamha zinda rahne ki khvaahish kaa haasil hai
ki lahza lahza apne aap hi mein mar rahaa huun main

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

main ne apni palkon par gham-kade sajaae hain
aarzu ke maatam mein sogvaar hasti hai

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate