miri nazar mein gae mausamon ke rang bhi hain — Mushfiq Khwaja

bujhe hue dar-o-divaar dekhne vaalo
use bhi dekho jo ik umr yaan guzaar gayaa

ye haal hai mire divaar-o-dar ki vahshat kaa
ki mere hote hue bhi makaan khaali hai

nazar churaa ke vo guzraa qarib se lekin
nazar bachaa ke mujhe dekhtaa bhi jaataa thaa

hazaar baar khud apne makaan pe dastak di
ik ehtimaal mein jaise ki main hi andar thaa

ye lamha lamha zinda rahne ki khvaahish kaa haasil hai
ki lahza lahza apne aap hi mein mar rahaa huun main

dil ek aur hazaar aazmaaishein gham ki
diyaa jalaa to thaa lekin havaa ki zad par thaa

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

us raat ke maathe par ubhreinge sitaare bhi
ye khauf andheron kaa shaadaab nahin rahnaa

azaab hoti hain aksar shabaab ki ghaDiyaan
gulaab apni hi khushbu se Darne lagte hain

ik khauf saa darakhton pe taari thaa raat-bhar
patte laraz rahe the havaa ke baghair bhi

Daraaegi hamein kyaa hijr ki andheri raat
ki shama baiThe hain pahle hi ham bujhaae hue