aandhi chali to naqsh-e-kaf-e-paa nahin milaa — Mustafa Zaidi

dil ke rishte ajiib rishte hain
saans lene se TuuT jaate hain

main usi koh-sifat khuun ki ik buund huun jo
reg-zaar-e-najaf o khaak-e-khuraasaan se milaa

aankh jhuk jaati hai jab band-e-qabaa khulte hain
tujh mein uThte hue khurshid ki uryaani hai

ham anjuman mein sab ki taraf dekhte rahe
apni tarah se koi akelaa nahin milaa

ishq in zaalimon ki duniyaa mein
kitni mazlum zaat hai ai dil

inhin pattharon pe chal kar agar aa sako to aao
mire ghar ke raaste mein koi kahkashaan nahin hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

duur ham se hain vo to kyaa Dar hai
paas hai apne aarsi dil ki

jab bhi aql banaati hai pahlaa misraa
dil ko misra-e-saani honaa paDtaa hai

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

kisi ki yaad manaane mein iid guzregi
so shahr-e-dil mein bahut duur tak udaasi hai