ham dil fidaa karein ki tasadduq-e-jigar karein — Nadir Shahjahanpuri

bhare rahte hain ashk aankhon mein har dam
miri har saans mein ab gham ki bu hai

tu hi vo phuul hai jo hai mahbub
patte patte kaa Daali Daali kaa

nang hai raaz-e-mohabbat kaa numaayaan honaa
mar bhi jaaun main agar tum na pareshaan honaa

rahmat-e-haq ko na kar maayus apne feal se
vo bhalaai mein nahin jo hai buraai mein mazaa

matlab kaa zamaana hai 'naadir' koi kyaa degaa
mujh sokhta-e-qismat ko degaa to khudaa degaa

phuul khulte hi titli bhi aai
kyaa koi dosti puraani hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

tujhe bhulaa ke bhi sadiyaan bhulaa nahin saktin
magar ye shart hai khud mein kamaal paidaa kar

miraa haal puchh ke ham-nashin mire soz-e-dil ko havaa na de
bas yahi duaa main karun huun ab ki ye gham kisi ko khudaa na de

ik hamaari sadaa thi is ban mein
lo ji khaamosh ho gae ham bhi