pursish-e-haal se gham aur na baDh jaae kahin — Nashtar Khaanqahi

ab tak hamaari umr kaa bachpan nahin gayaa
ghar se chale the jeb ke paise giraa diye

main ghar basaa ke samundar ke biich soyaa thaa
uThaa to aag ki lapTon mein thaa makaan miraa

dhamak kahin ho larazti hain khiDkiyaan meri
ghaTaa kahin ho Tapaktaa hai saaebaan miraa

din nikalnaa thaa ki saare shahr mein bhagdaD machi
anginat khvaabon ke chehre bhiiD mein gum ho gae

har baar nayaa le ke jo fitna nahin aayaa
is umr mein aisaa koi lamha nahin aayaa

bichhaD kar us se sikhaa hai tasavvur ko badan karnaa
akele mein use chhunaa akele mein sukhan karnaa

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai