pyaar ki khud-farebiyaan tauba — Jazib Quraishi

mujh ko baDe khulus se barbaad kar diyaa
'jaazib' kisi ne ek havas-kaar ke liye

teri khushbu pyaar ke lahje mein bole to sahi
dil ki har dhaDkan ko ik chehra nayaa mil jaaegaa

mire vajud ke khushbu-nigaar sahraa mein
vo mil gae hain to mil kar bichhaD bhi sakte hain

daftar ki thakan oDh ke tum jis se mile ho
us shakhs ke taaza lab-o-rukhsaar to dekho

kuchh mere dhaDakte hue dil ne bhi pukaaraa
kuchh aap ko baazaar mein dhokaa bhi huaa hai

kyuun maang rahe ho kisi baarish ki duaaein
tum apne shikasta dar-o-divaar to dekho

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ishq ke kaarobaar ko aksar
garmi-e-kaarobaar le Duubi

mohabbat to ham ne bhi ki aur bahut ki
magar husn ko ishq karnaa na aayaa

ji churaane ki nahin shart dil-e-zaar yahaan
ranj uThaane hi ki Thahri hai to phir dil se uThaa

ishq mein ain hunar-mandi hai
sab jise be-hunari kahte hain