aankh bhar ishq aur badan bhar chaah — Nazeer Azad

zarra zarra karbalaa manzar-ba-manzar tishnagi
apne hisse mein to aai hai saraasar tishnagi

aabaad hai is dil kaa jahaan jis ke qadam se
vo mujh ko pukaare hai kisi aur jahaan se

kyaa milaa juz sukut-e-be-paayaan
shor siine mein kaarvaan bhar thaa

tiraa khayaal mire dil mein kaise ghar kartaa
tiraa khayaal miri vahshaton se aage hai

daastaan-go thaa kisi baab se niklaa hogaa
vo jo kahtaa thaa ki divaar mein dar miltaa hai

tujh mein gar baarish samundar ke baraabar hai to kyaa
mere andar bhi hai sahraa ke baraabar tishnagi

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

hamaare ishq aur un ke taghaaful kaa ye aalam hai
ki ham dil haar baiThe hain vo lene haar leTe hain

sach ye hai ham hi mohabbat kaa sabaq paDh na sake
varna an-paDh to na the ham ko paDhaane vaale

kar letaa huun band aankhein main divaar se lag kar
baiThe hai kisi se jo koi pyaar se lag kar

kaisaa maqaam aayaa mohabbat ki raah mein
dil ro rahaa hai meraa magar aankh tar nahin