rahzanon se mat Daro tum paarsaaon se bachcho — Popular Meeruthi

dastakhat to tumhein bhi aate hain
abbaa tum bhi vazir ban jaate

khud tiis kaa hai aur dulhan saaTh baras ki
girti hui divaar ke saae mein khaDaa hai

be-vaqufi ke anokhe kaarnaame dekh kar
achchhe-khaase leaderon ko bhi gadhaa kahnaa paDaa

apni shohrat ki alag raah nikaali ham ne
kisi divaan se ghazal koi churaa li ham ne

teraa aadhaa kaam khud insaan hi karne lage
kaam teraa ab to ai shaitaan aadhaa rah gayaa

meraa sasuraal mein koi bhi taraf-daar nahin
un ke honTon pe bhi taale hain khudaa khair kare

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

banaanaa hai hamein ab apne haathon apni qismat ko
hamein apne vatan kaa aap beDaa paar karnaa hai

vatan ki sar-zamin se ishq-o-ulfat ham bhi rakhte hain
khaTakti jo rahe dil mein vo hasrat ham bhi rakhte hain

bas dariche se lage baiThe rahe ahl-e-safar
sabza jaltaa rahaa aur yaad-e-vatan aati rahi

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

aisaa hai ki sikkon ki tarah mulk-e-sukhan mein
jaari koi ik yaad puraani karein ham bhi