khaamosh is tarah se na jal kar dhuaan uThaa — Qadr Oraizi

jis ko khud apnaa eatibaar na ho
aise insaan kaa eatibaar na kar

log tujh ko haqir samjheinge
had se zaaid bhi inkisaar na kar

be-rabtiyon ne 'qadr' miTaai jo rabt ki
hai gosht ko bhi apne na ab ustukhvaan se rabt

duniyaa ko ham se kaam na duniyaa se ham ko kaam
khaatir se teri rakhte hain saare-jahaan se rabt

toDaa nahin jaa saktaa paimaan mohabbat kaa
nuqsaan khud apnaa hai nuqsaan mohabbat kaa

kyuun ishq ke jhagDe ko le jaataa hai uqbaa mein
kar khaatma duniyaa mein duniyaa ki musibat kaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gul kiyaa jis ne vo thaa aur magar
shama ne shikva havaaon se kiyaa

maarka garm to ho lene do khun-rezi kaa
pahle shamshir ke niche hamin jaa baiTheinge

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

ek hi anjaam hai ai dost husn o ishq kaa
shama bhi bujhti hai parvaanon ke jal jaane ke baad

hai shaam-e-avadh gesu-e-dildaar kaa partav
aur subh-e-banaras hai rukh-e-yaar kaa partav