mujhe bachaa le mire yaar soz-e-imshab se — Qamar Abbas Qamar

ab ki mumkin hai zamin khuun ki pyaasi na rahe
ik qabile ne meri baat nahin maani hai

tishna-lab aisaa ki honTon pe paDe hain chhaale
mutmain aisaa huun dariyaa ko bhi hairaani hai

shiddat-e-gham se koi gham bhi nahin ho paayaa
jaane vaale tiraa maatam bhi nahin ho paayaa

akelaa-pan hai aur aisaa akelaa-pan jis mein
koi jo puchh le kuchh sab bataane lagte hain

anaa ne donon ke biich nafrat ki ek divaar khinch di hai
udhar se aane kaa masala hai idhar se jaane kaa masala hai

hamaari raat kaa ik vaqt tai hai jis mein ham
tamaam bichhDe huon ko bulaane lagte hain

jab ki pahlu se yaar uThtaa hai
dard be-ikhtiyaar uThtaa hai

jo munh se kahte hain kuchh aur karte hain kuchh aur
vahi zamaana mein kuchh ikhtiyaar rakhte hain

kam-ayaari ne khudaa-soz banaayaa aisaa
but to sab yaad rahe ek khudaa bhuul gae

ghazal kahne mein yuun to koi dushvaari nahin hoti
magar ik masala ye hai ki meyaari nahin hoti

samajh liyaa thaa tujhe dost ham ne dhoke mein
so aaj se tujhe baar-e-digar samajhte hain

sab doston se mujh ko ziyaada 'aziz hai
aisaa bhi ek shakhs mire dushmanon mein hai