shiddat-e-gham se koi gham bhi nahin ho paayaa — Qamar Abbas Qamar

ab ki mumkin hai zamin khuun ki pyaasi na rahe
ik qabile ne meri baat nahin maani hai

tishna-lab aisaa ki honTon pe paDe hain chhaale
mutmain aisaa huun dariyaa ko bhi hairaani hai

mujhe bachaa le mire yaar soz-e-imshab se
ki ik sitaara-e-vahshat jabin se guzregaa

akelaa-pan hai aur aisaa akelaa-pan jis mein
koi jo puchh le kuchh sab bataane lagte hain

anaa ne donon ke biich nafrat ki ek divaar khinch di hai
udhar se aane kaa masala hai idhar se jaane kaa masala hai

hamaari raat kaa ik vaqt tai hai jis mein ham
tamaam bichhDe huon ko bulaane lagte hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

dosto jashn manaao ki bahaar aai hai
phuul girte hain har ik shaakh se aansu ki tarah

daam-e-gham-e-hayaat mein uljhaa gai umiid
ham ye samajh rahe the ki ehsaan kar gai

ek teraa gham jis ko raah-e-mo'tabar jaanein
is safar mein ham kis ko apnaa ham-safar jaanein