akelaa-pan hai aur aisaa akelaa-pan jis mein — Qamar Abbas Qamar

ab ki mumkin hai zamin khuun ki pyaasi na rahe
ik qabile ne meri baat nahin maani hai

tishna-lab aisaa ki honTon pe paDe hain chhaale
mutmain aisaa huun dariyaa ko bhi hairaani hai

mujhe bachaa le mire yaar soz-e-imshab se
ki ik sitaara-e-vahshat jabin se guzregaa

shiddat-e-gham se koi gham bhi nahin ho paayaa
jaane vaale tiraa maatam bhi nahin ho paayaa

anaa ne donon ke biich nafrat ki ek divaar khinch di hai
udhar se aane kaa masala hai idhar se jaane kaa masala hai

hamaari raat kaa ik vaqt tai hai jis mein ham
tamaam bichhDe huon ko bulaane lagte hain

raasta sunsaan thaa to muD ke dekhaa kyuun nahin
mujh ko tanhaa dekh kar us ne pukaaraa kyuun nahin

ik arz sab siin chhup kar karni hai ham kuun tum siin
raazi ho gar kaho to khalvat mein aa ke kar jaan

miri tanhaai mujh se kahti hai
bhaaD mein jaae bhiiD aao idhar

fasurda-dil kabhi khalvat na anjuman mein rahe
bahaar ho ke rahe ham to jis chaman mein rahe

tez itnaa hi agar chalnaa hai tanhaa jaao tum
baat puuri bhi na hogi aur ghar aa jaaegaa

tu ne vahdat ko kar diyaa kasrat
kabhi tanhaa nazar nahin aataa