mohmal hai na jaanein to, samjhein to vazaahat hai — Quaiser Khalid

miThi baatein, kabhi talkh lahje ke tiir
dil pe har din hai un kaa karam bhi nayaa

tere bin hayaat ki soch bhi gunaah thi
ham qarib-e-jaan tiraa hisaar dekhte rahe

ho paae kisi ke ham bhi kahaan yuun koi hamaaraa bhi na huaa
kab Thahri kisi ik par bhi nazar kyaa chiiz hai shahr-e-khubaan bhi

ab is tarah bhi rivaayat se inhiraaf na kar
badal agarche tu achchhaa na de, kharaab to de

Daal di pairon mein us shakhs ke zanjir yahaan
vaqt ne jis ko zamaane mein uchhalte dekhaa

kuchh tu hi bataa aakhir kyun-kar tire bandon par
har shab hai nai aafat har roz musibat hai

jaan kar us but kaa ghar kaaba ko sajda kar liyaa
ai barahman mujh ko baitullaah ne dhokaa diyaa

mujh ko na dil pasand na vo bevafaa pasand
donon hain khud-gharaz mujhe donon hain naa-pasand

dil vo kaafir hai ki mujh ko na diyaa chiin kabhi
bevafaa tu bhi use le ke pashemaan hogaa

tasvir kyuun dikhaaein tumhein naam kyuun bataaein
laae hain ham kahin se kisi bevafaa ki hai

bevafaai pe teri ji hai fidaa
qahr hotaa jo baa-vafaa hotaa

muddat se main safar mein huun vahm-o-gumaan ke saath
ye raasta tamaam fareb-e-nazar na ho