sab kaa alag andaaz thaa sab rang rakhte the judaa — Raghvendra Dwivedi

main zaraa saa kyaa khulaa vo khud simaTne lag gayaa
jo kahaa kartaa thaa mujh se khul ke kyon milte nahin

ik tire kahne se meraa kam nahin kirdaar hogaa
ye alag hai baat main teri kahaani mein nahin huun

jis ne kiyaa hai qatl vahi chikh chikh kar
sab se ye kah rahaa hai ki qaatil pata karo

shahr ke pakke makaanon mein daraarein aa gaiin
gaanv ke kachche gharon ki niinv pakki thi bahut

vo ishaara kar ke pichhe haT gayaa thaa ek din
us ishaare ko samajhne mein lagaa huun aaj tak

aag se rishta hai meraa aur dariyaa bhi hai apnaa
aae din donon ke jhagDe mein ulajh kar rah gayaa huun

apne manzar se alag hotaa nahin hai koi rang
apni aankhon ke sivaa baad-e-bahaari aur kyaa

din judaai kaa diyaa vasl ki shab ke badle
lene the ai falak-e-pir ye kab ke badle

maut aa jaae vabaa mein ye alag baat magar
ham tire hijr mein naagha to nahin kar sakte

is dard-e-judaai se kahin jaan nikal jaae
'aazurdaa' mire haq mein zaraa yuun bhi duaa kar

garmi lagi to khud se alag ho ke so gae
sardi lagi to khud ko dobaara pahan liyaa

hijr ne us ke hamein bakhshi ghazal
ham firaaq-e-yaar kaa gham kyon karein