saath 'ghaalib' ke gai fikr ki gahraai bhi — Rajesh Reddy

kiyaa ijaad jis ne bhi khudaa ko
vo khud ko kaise bahlaataa thaa pahle

sab log is se pahle ki devtaa samajhte
ham ne zaraa saa khud ko insaan kar liyaa hai

kyaa jaane kis jahaan mein milegaa hamein sukun
naaraaz hain zamin se khafaa aasmaan se ham

justuju kaa ik ajab silsila taa-umr rahaa
khud ko khonaa thaa kahin aur kahin DhunDhnaa thaa

ijaazat kam thi jiine ki magar mohlat ziyaada thi
hamaare paas marne ke liye fursat ziyaada thi

kaun paDhtaa hai yahaan khol ke ab dil ki kitaab
ab to chehre ko hi akhbaar kiyaa jaanaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

ujaalaa 'ilm kaa phailaa to hai chaaron taraf yaaro
basirat aadmi ki kuchh magar kam hoti jaati hai

tumhaari bazm se nikle to ham ne ye sochaa
zamin se chaand talak kitnaa faasla hogaa

ye tamaashaa-e-ilm-o-hunar dosto
kuchh nahin hai faqat kaaghzi vahm hai

aql se sirf zehan raushan thaa
ishq ne dil mein raushni ki hai