hijaabaana aa kar vo chalte bane — Razi Abuzar

kisi se mil ke kisi ko buraa saa lagtaa hai
baDaa gunaah hai garche zaraa saa lagtaa hai

raabte TuuTe hain rishte rah gae hain naam ke
talkhiyaan haael dilon ke darmiyaan hoti gaiin

shafaq kaa rang sukun hai sahar ke chehre par
ki gesu-e-shab-e-gham be-qaraar hai ab tak

jalaa hai parda-e-shab mein hujum-e-parvaana
barahna sham' magar be-qaraar hai ab tak

jab zabaan rakkhi hai main ne halqa-e-zanjir mein
tab kahin aai hai shiddat she'r ki taasir mein

sar-e-khaamushi ye sajaavaTein usi rang-o-bu ki misaal hain
jo mahak ho qabr ke phuul mein jo chamak ho sham'-e-mazaar mein

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ham to apnon se bhi begaana hue ulfat mein
tum jo ghairon se mile tum ko na ghairat aai

aatish-e-ishq vo jahannam hai
jis mein firdaus ke nazaare hain

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

charchaa hamaaraa ishq ne kyuun jaa-ba-jaa kiyaa
dil us ko de diyaa to bhalaa kyaa buraa kiyaa