chalo ki ham bhi zamaane ke saath chalte hain — Sada Ambalvi

zikr meraa aaegaa mahfil mein jab jab dosto
ro paDeinge yaad kar ke yaar sab yaari miri

vaqt har zakhm kaa marham to nahin ban saktaa
dard kuchh hote hain taa-umr rulaane vaale

bujh gai shama ki lau tere dupaTTe se to kyaa
apni muskaan se mahfil ko munavvar kar de

apni urdu to mohabbat ki zabaan thi pyaare
uff siyaasat ne use joD diyaa mazhab se

kyuun sadaa pahne vo teraa hi pasandida libaas
kuchh to mausam ke mutaabiq bhi sanvarnaa hai use

kitnaa sochaa thaa dil lagaaeinge
sochte sochte hayaat hui

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

aankhon se khvaab dil se tamannaa tamaam-shud
tum kyaa gae ki shauq-e-nazaara tamaam-shud

un ke dil ki kudurat aur baDhi
zikr kijiye agar safaai kaa

kis ko thi khabar is mein taDakh jaaegaa dil bhi
ham khush the bahut sehn mein divaar uThaa kar

jaan agar ho jaan to kyun-kar na ho tujh par nisaar
dil agar ho dil tiri surat pe shaidaa kyuun na ho