apni urdu to mohabbat ki zabaan thi pyaare — Sada Ambalvi

zikr meraa aaegaa mahfil mein jab jab dosto
ro paDeinge yaad kar ke yaar sab yaari miri

vaqt har zakhm kaa marham to nahin ban saktaa
dard kuchh hote hain taa-umr rulaane vaale

bujh gai shama ki lau tere dupaTTe se to kyaa
apni muskaan se mahfil ko munavvar kar de

kyuun sadaa pahne vo teraa hi pasandida libaas
kuchh to mausam ke mutaabiq bhi sanvarnaa hai use

tum sitaaron ke bharose pe na baiThe rahnaa
apni tadbir se taqdir banaate jaao

kitnaa sochaa thaa dil lagaaeinge
sochte sochte hayaat hui

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

lazzat-e-dard mili jurm-e-mohabbat mein use
vo sazaa paai hai dal ne ki khataa jhuum uThi

junun bhi zahmat khirad bhi laanat hai zakhm-e-dil ki davaa mohabbat
harim-e-jaan mein tavaaf-e-paiham yahi hai andaaz-e-aashiqaana

ishq-e-mizhgaan mein hazaaron ne gale kaTvaae
id-e-qurbaan mein jo vo le ke chhuri baiTh gayaa