ki jaise sehn-e-gulistaan mein pyaar kaa mausam — Saeed Ahmad Akhtar

ye miraa ilhaam hai vo miri tadbir hai
main na junun kaa asiir main na khirad kaa ghulaam

ek ham tinon mein mar jaae to chhap jaaegi
likh to rakkhi hai tiri prem kahaani main ne

sajda kahaan lagaa hai hamaari jabin kaa
charchaa hai phir falak pe tire dar-nashin kaa

shabaab tum se karegaa jo tum ne ham se kiyaa
tumhaaraa husn bhi niklegaa bevafaa mausam

aayaa thaa sun ke shahr mein daulat ki rel-pel
kal mill mein kaT ke mar gayaa beTaa kisaan kaa

mire to phuul bhi tum ho sabaa bhi khushbu bhi
nahin ho tum to nahin mere kaam kaa mausam

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

gar nahin ye 'ishq to phir aur kyaa shai hai bhalaa
jo pas-e-parda rahe aur qalb meraa khaae hai

zindagi jis ne talkh ki meri
vo mujhe zindagi se pyaaraa hai

ai gham-e-ishq tujh se haar gae
jaan de kar bhi sharmsaar uThe

najd se jaanib-e-lailaa jo havaa aati hai
dil-e-majnun ke dhaDakne ki sadaa aati hai