gul apne ghunche apne gulsitaan apnaa bahaar apni — Saghar Nizami

sailaab-e-tabassum se darmaan-e-jaraahat kar
TukDe dil-e-bismil ke aaluda-e-khun kab tak

vo savaal-e-lutf par patthar na barsaaein to kyuun
un ko parvaa-e-shikast-e-kaasa-e-saail nahin

dil ki barbaadiyon kaa ronaa kyaa
aise kitne hi vaaqiaat hue

sajde miri jabin ke nahin is qadar haqir
kuchh to samajh rahaa huun tire aastaan ko main

DhunDhne ko tujhe o mere na milne vaale
vo chalaa hai jise apnaa bhi pataa yaad nahin

husn ne dast-e-karam khinch liyaa hai kyaa khuub
ab mujhe bhi havas-e-lazzat-e-aazaar nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ai sanam tu vo kanhayyaa hai balaaein luun agar
baansuli ki tarah naalaan hon saraapaa ungliyaan

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

gul kiyaa jis ne vo thaa aur magar
shama ne shikva havaaon se kiyaa

gulaabon ke honTon pe lab rakh rahaa huun
use der tak sochnaa chaahtaa huun