ghar ke baare mein yahi jaan sakaa huun ab tak — Sagheer Malal

un se bachnaa ki bichhaate hain panaahein pahle
phir yahi log kahin kaa nahin rahne dete

bas is khayaal se dekhaa tamaam logon ko
jo aaj aise hain kaise vo kal rahe honge

taajjub un ko hai kyuun meri khud-kalaami par
har aadmi kaa koi raaz-daan zaruri hai

ek lamhe mein zamaana huaa takhliq 'malaal'
vahi lamha hai yahaan aur zamaana hai vahi

samajhtaa huun main agar sab alaamatein us ki
to phir vo meri tarah se hi sochtaa hogaa

ek rahne se yahaan vo maavaraa kaise huaa
sab se pahlaa aadmi khud se judaa kaise huaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ishq binaai baDhaa detaa hai
jaane kyaa kyaa nazar aataa hai mujhe

khul kar to vo mujh se kabhi miltaa hi nahin hai
aur us se bichhaD jaane kaa imkaan hai yuun bhi