zindagi kis tarah kaTegi 'saif' — Saifuddin Saif

shor din ko nahin sone detaa
shab ko sannaaTaa jagaa detaa hai

husn jalva dikhaa gayaa apnaa
ishq baiThaa rahaa udaas kahin

'saif' andaaz-e-bayaan rang badal detaa hai
varna duniyaa mein koi baat nai baat nahin

kitne anjaan hain kyaa saadgi se puchhte hain
kahiye kyaa meri kisi baat pe ronaa aayaa

ye aalaam-e-hasti ye daur-e-zamaana
to kyaa ab tumhein bhuul jaanaa paDegaa

hamein khabar hai vo mehmaan ek raat kaa hai
hamaare paas bhi saamaan ek raat kaa hai

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

tamaam umr tiri ham-rahi kaa shauq rahaa
magar ye ranj ki main mauja-e-sabaa na huaa

hijr ke daur mein har daur ko shaamil kar lein
is mein shaamil yahi ik umr-e-gurezaan kyuun hai

hamaare paas koi gardish-e-dauraan nahin aati
ham apni umr-e-faani saaghar-o-minaa mein rakhte hain