hamein khabar hai vo mehmaan ek raat kaa hai — Saifuddin Saif

shor din ko nahin sone detaa
shab ko sannaaTaa jagaa detaa hai

husn jalva dikhaa gayaa apnaa
ishq baiThaa rahaa udaas kahin

'saif' andaaz-e-bayaan rang badal detaa hai
varna duniyaa mein koi baat nai baat nahin

zindagi kis tarah kaTegi 'saif'
raat kaTti nazar nahin aati

ye aalaam-e-hasti ye daur-e-zamaana
to kyaa ab tumhein bhuul jaanaa paDegaa

kitne anjaan hain kyaa saadgi se puchhte hain
kahiye kyaa meri kisi baat pe ronaa aayaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

khairaat mein de aayaa huun jiiti hui baazi
duniyaa ye samajhti hai ki main haar gayaa huun

meri nigaah-e-shauq bhi kuchh kam nahin magar
phir bhi tiraa shabaab tiraa hi shabaab hai

raat ke lamhaat khuni daastaan likhte rahe
subh ke akhbaar mein haalaat behtar ho gae

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri