log bimaar hain hasad ke sabab — Saleem Amrohvi

tumhaaraa zikr jab se aa gayaa hai
maza aane lagaa hai guftugu mein

sabhi se jab mohabbat chaahte ho
mohabbat kyon nahin karte sabhi se

yuun to maujud apne ghar mein hai
aadmi mustaqil safar mein hai

main jitnaa sabr kartaa jaa rahaa huun
vo utnaa aazmaataa jaa rahaa hai

adab mein bhi luTere aa gae hain
kahaan rakkhun khayaal apnaa bachaa kar

fazaa mein zahr gholaa jaa rahaa hai
baDi mushkil se bolaa jaa rahaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

jab se 'ummid' gayaa hai koi!!
lamhe sadiyon ki alaamat Thahre

makaan-e-dil se rukhsat ho gayaa 'ishq
udaasi lauT kar tu ghar chali aa

us hijr pe tohmat ki jise vasl ki zid ho
us dard pe laanat ki jo ashaar mein aa jaae