adab itnaa ki qadmon mein paDe hain — Shad Siddiqi

kis ne ki hain ye botalein khaali
pi gayaa kaun apni tanhaai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

nayaa chaar din mein puraanaa huaa
yahi sab huaa to nayaa kyaa huaa

kabhi bhi pashemaan na honge kiye par
salaamat raheingi anaaein hamaari

hamein to khvaab kaa ik shahr aankhon mein basaanaa thaa
aur is ke baa'd mar jaane kaa sapnaa dekh lenaa thaa