mai-khaana-e-hasti mein muflis ki javaani kyaa — Shahab Lakhnavi

naala-e-bulbul se ghunchon ke kaleje phaT gae
gulsitaan vaale samajhte hain ki gul khandaan hue

saamne mohabbat ke hech hai siyaasat bhi
jab dimaagh thak jaae dil se kaam le ai dost

kaun ehsaan-e-naa-khudaai le
is se behtar to Duub jaanaa hai

dayaar-e-ghair mein luTte to koi baat na thi
luTe vatan mein to sadma huaa na jaane kyuun

aur baDhte to khudaai kaa bhi daave karte
khair guzri ki ye but rah gae but-khaane mein

karo gunaah-e-mohabbat tamaam umr 'shahaab'
khudaa ki di hui neamat buton ke kaam aae

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

khamosh rahne ki aadat bhi maar deti hai
tumhein ye zahr to andar se chaaT jaaegaa

sab apne apne tariqe se bhiik maangte hain
koi ba-naam-e-mohabbat koi ba-jaama-e-ishq

us ne meri shaakhon ko is tarah numu bakhshi
zakhm ke khileinge phuul dard kaa chaman hogaa

ye daagh-e-ishq jo miTtaa bhi hai chamaktaa bhi hai
ye zakhm hai ki nishaan hai mujhe nahin maalum