jis taraf ko main gayaa rotaa huaa — Shaikh Zahuruddin Hatim

phaDkun to sar phaTe hai na phaDkun to ji ghaTe
tang is qadar diyaa mujhe sayyaad ne qafas

kabhu bimaar sun kar vo ayaadat ko to aataa thaa
hamein apne bhale hone se vo aazaar behtar thaa

bul-havas go karein tere lab-e-shirin par hujum
talkh mat ho ki miThaai se magas aati hai

meraa maashuq hai mazon mein bharaa
kabhu miThaa kabhu salonaa hai

dekhun huun tujh ko duur se baiThaa hazaar kos
ainak na chaahiye na yahaan durbin mujhe

ai khizaan bhaag jaa chaman se shitaab
varna fauj-e-bahaar aave hai

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

taa-falak le gai betaabi-e-dil tab bole
hazrat-e-ishq ki pahlaa hai ye ziinaa apnaa

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

main aasmaan-o-zamin ke jhagDe mein yunhi be-vajh paD gayaa thaa
koi bulaataa hai paas apne kisi ke hamraah chal rahaa huun

subh tak raat ki zanjir pighal jaaegi
log paagal hain sitaaron se ulajhnaa kaisaa