zamaana laakh sitaaron ko chhu ke aa jaae — Khaleel Tanveer

parind unchi uDaanon ki dhun mein rahtaa hai
magar zamin ki hadon mein basar bhi kartaa hai

vo log apne aap mein kitne aziim the
jo apne dushmanon se bhi nafrat na kar sake

auron ki buraai ko na dekhun vo nazar de
haan apni buraai ko parakhne kaa hunar de

rusvaa hue zalil hue dar-ba-dar hue
haq baat lab pe aai to ham be-hunar hue

parind shaakh pe tanhaa udaas baiThaa hai
uDaan bhuul gayaa muddaton ki bandish mein

main kyaa huun kaun huun kyaa chiiz mujh mein muzmar hai
kai hijaab uThaae magar hijaab mein huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ab kaargah-e-dahr mein lagtaa hai bahut dil
ai dost kahin ye bhi tiraa gham to nahin hai

ye apne dil ki lagi ko bujhaane aate hain
paraai aag mein jalte nahin hain parvaane

zabaan pe shukr o shikaayat ke sau fasaane hain
magar jo dil pe guzarti hai kyaa kahaa jaae

ab aa gae ho to Thahro kharaaba-e-dil mein
ye vo jagah hai jahaan zindagi sanvarti hai