koi aise vaqt mein ham se bichhDaa hai — Shamim Abbas

saal, par saal, aur phir is saal
muntazir ham the muntazir ham hain

kabhi mai-kada kabhi but-kada kabhi kaaba to kabhi khaanqaah
ye tiri talab kaa junun thaa mujhe kab kisi se lagaav thaa

TaTolo parakh lo chalo aazmaa lo
khudaa ki qasam baa-khudaa aadmi huun

aa tire sang zaraa peing baDhaai jaae
zindagi baiTh tujhe chaae pilaai jaae

use na milne ki sochaa hai yuun sazaa deinge
har ek jism pe chehraa vahi lagaa deinge

yaad aati hai achchhi si koi baat sar-e-shaam
phir subh talak sochte rahte hain vo kyaa thi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

maarka garm to ho lene do khun-rezi kaa
pahle shamshir ke niche hamin jaa baiTheinge

subh le jaate hain ham apnaa janaaza ghar se
shaam ko phir use kaandhon pe uThaa laate hain

gum-sum saa khaDaa hai koi darvaaza-e-dil par
is shaam kaa manzar to dil-aavez bahut hai

tire ufuq pe sadaa subh jagmagaati rahe
jahaan pe main huun vahaan shaam hone vaali hai