subh le jaate hain ham apnaa janaaza ghar se — Kafeel Aazar Amrohvi

jab se ik khvaab ki taabir mili hai mujh ko
main har ik khvaab ki taabir se ghabraataa huun

tum ko maahaul se ho jaaegi nafrat 'aazar'
itne nazdik se dekhaa na karo yaaron ko

koi manzil nahin milti to Thahar jaate hain
ashk aankhon mein musaafir ki tarah aate hain

jaate jaate ye nishaani de gayaa
vo miri aaankhon mein paani de gayaa

ek ik baat mein sachchaai hai us ki lekin
apne vaadon se mukar jaane ko ji chaahtaa hai

us ki aankhon mein utar jaane ko ji chaahtaa hai
shaam hoti hai to ghar jaane ko ji chaahtaa hai

zabaan zabaan pe shor thaa ki raat khatm ho gai
yahaan sahar ki aas mein hayaat khatm ho gai

mar mar ke agar shaam to ro ro ke sahar ki
yuun zindagi ham ne tiri duuri mein basar ki

sadiyon tak ehtimaam-e-shab-e-hijr mein rahe
sadiyon se intizaar-e-sahar kar rahe hain ham

yuun ehtimaam-e-radd-e-sahar kar diyaa gayaa
har raushni ko shahr-badar kar diyaa gayaa

har subh apne ghar mein usi vaqt jaagnaa
aazaad log bhi to giraftaar se rahe

is tarah chashm-e-nim-vaa ghaafil bhi thi bedaar bhi
jaise nasha ho raat kaa yaa subh kaa taDkaa huaa