miri khushi se mire doston ko gham hai 'shamim' — Shamim Jaipuri

bahut tavil shab-e-gham hai kyaa kiyaa jaae
umid-e-subh bahut kam hai kyaa kiyaa jaae

tark-e-mohabbat par bhi hogi un ko nadaamat ham se ziyaada
kis ne ki hai kaun karegaa un se mohabbat ham se ziyaada

baa-vafaai ki adaa paane lagaa huun tujh mein
ai jafaa-dost ye kyaa dekh rahaa huun tujh mein

duniyaa hai ki gosha-e-jahannam
har vaqt azaab-e-ilaahi tauba

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

'bedi' mariz dil kaa huun aur dard kaa safir
mar jaaungaa na us ne agar dekh-bhaal ki

jab vo zakhmon se davaa baandhtaa hai
dard kuchh aur mazaa baandhtaa hai