bahut tavil shab-e-gham hai kyaa kiyaa jaae — Shamim Jaipuri

miri khushi se mire doston ko gham hai 'shamim'
mujhe bhi is kaa bahut gham hai kyaa kiyaa jaae

tark-e-mohabbat par bhi hogi un ko nadaamat ham se ziyaada
kis ne ki hai kaun karegaa un se mohabbat ham se ziyaada

baa-vafaai ki adaa paane lagaa huun tujh mein
ai jafaa-dost ye kyaa dekh rahaa huun tujh mein

duniyaa hai ki gosha-e-jahannam
har vaqt azaab-e-ilaahi tauba

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

yaa rab miri duaaon mein itnaa asar rahe
phulon bharaa sadaa miri bahnaa kaa ghar rahe

ehsaas baDhaa detaa hai har dard ki shiddat
mahsus karoge to kasak aur baDhegi

gham hi gham hain tiri ummid mein kyaa rakkhaa hai
iid aayaa kare ab iid mein kyaa rakkhaa hai