safar kaa marhala-e-sakht hi ghanimat thaa — Naseem Sahar

aavaazon ki bhiiD mein itne shor-sharaabe mein
apni bhi ik raae rakhnaa kitnaa mushkil hai

lafz bhi jis ahd mein kho baiThe apnaa e'tibaar
khaamushi ko is mein kitnaa mo'tabar main ne kiyaa

ba-naam-e-amn-o-amaan kaun maaraa jaaegaa
na jaane aaj yahaan kaun maaraa jaaegaa

jo yaad-e-yaar se guft-o-shunid kar li hai
to goyaa phuul se khushbu kashid kar li hai

jo baat ki thi havaa mein bikharne vaali thi
jo khat likhaa thaa vo purzon mein baTne vaalaa thaa

diye ab shahr mein raushan nahin hain
havaa ki hukmaraani ho gai kyaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

raaegaan ho rahi thi tanhaai
teri yaadon kaa kaarobaar kiyaa

phir kisi bevafaa ki yaad aai
phir kisi ne liyaa vafaa kaa naam

kisi paaband-e-gham ki zindagi kyaa
kabhi naale kabhi fariyaad karnaa

yaad-e-maazi gham-e-imroz umid-e-fardaa
kitne saae mire hamraah chalaa karte hain