yaad aur yaad ko bhulaane mein — Sheen Kaaf Nizam

vahshat to sang-o-khisht ki tartib le gai
ab fikr ye hai dasht ki vusat bhi le na jaae

nikle kabhi na ghar se magar is ke baavajud
apni tamaam umr safar mein guzar gai

darvaaza koi ghar se nikalne ke liye de
be-khauf koi raasta chalne ke liye de

chubhan ye piiTh mein kaisi hai muD ke dekh to le
kahin koi tujhe pichhe se dekhtaa hogaa

gali ke moD se ghar tak andheraa kyuun hai 'nizaam'
charaagh yaad kaa us ne bujhaa diyaa hogaa

udaasi akele mein Dar jaaegi
ghaDi-do-ghaDi ko khushi bhej de

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

laakh bhaage zad pe jab aa jaaegi
zindagi teri qazaa khaa jaaegi

ab 'umr kaa ehsaas dilaane lage jugnu
daaman se miri aankh mein aane lage jugnu

zindagi tujh se har ik saans pe samjhautaa karun
shauq jiine kaa hai mujh ko magar itnaa bhi nahin