tanhaai kaa ik aur maza luuT rahaa huun — Shuja Khaavar

'shujaa' vo khairiyat puchhein to hairat mein na paD jaanaa
pareshaan karne vaale khair-khvaahon mein bhi hote hain

chaaragari ki baat kisi aur se karo
ab ho gae hain yaaro puraane mariz ham

us ke bayaan se hue har-dil-aziz ham
gham ko samajh rahe the chhupaane ki chiiz ham

tangi-e-haiat se Takraataa huaa josh-e-mavaad
shaaeri kaa lutf aa jaataa hai chhoTi bahr mein

yaa to jo naa-fahm hain vo bolte hain in dinon
yaa jinhein khaamosh rahne ki sazaa maalum hai

do chaar nahin sainkaDon sher us pe kahe hain
is par bhi vo samjhe na to qadmon pe jhukein kyaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

dard ne li angDaai aisi
zakhm kaa ik ik Taankaa TuuTaa

ruke jis dam vo dam lene to sadr-e-anjuman bolin
hamaari nasl-e-aainda bhi ab aane hi vaali hai

adaa huaa hai jo ik lafz be-asaas na ho
miraa khudaa kahin meri tarah udaas na ho