naasehaa puchhte phirte hain sabab uljhan kaa — Syed Huzaifa Kaif

gar nahin ye 'ishq to phir aur kyaa shai hai bhalaa
jo pas-e-parda rahe aur qalb meraa khaae hai

main tumhein paa na sakun tum mujhe apnaa na sako
phir yahi khel miri jaan dubaara ho jaae

us ki hi mohabbat mein gire dost ki jis se
ham baat talak karne ko tayyaar nahin the

jin se khud aap sanbhaalaa nahin jaataa khud ko
un kaa daa'vaa hai ki vo aa ke sanbhaaleinge mujhe

main tahayya kar ke baiThaa thaa ki duniyaa chhoD duun
koi koyal 'ain us mauqa' pe gaane aa gai

'kaif' kahte hain naaseh ki tanhaa raho
main khudaa to nahin huun jo yaktaa rahun

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kabhi tegh-e-tez supurd ki kabhi tohfa-e-gul-e-tar diyaa
kisi shaah-zaadi ke ishq ne miraa dil sitaaron se bhar diyaa

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain

ai gham-e-ishq tujh se haar gae
jaan de kar bhi sharmsaar uThe

phir oDh kar chali hai havas ishq ki ridaa
phir baDh gae fareb ke imkaan nae nae