kai paDaav the manzil ki raah mein 'taabish' — Tabish Kamal

kab khulegaa ki falak paar se aage kyaa hai
kis ko maalum ki divaar se aage kyaa hai

utar gayaa hai rag-o-pai mein zaaiqa us kaa
ajiib shahad saa kal raat us zabaan mein thaa

yaqin se jo gumaan kaa faasla hai
zamin se aasmaan kaa faasla hai

ajab yaqin saa us shakhs ke gumaan mein thaa
vo baat karte hue bhi nai uDaan mein thaa

zamaane se alag thi meri duniyaa
main us ki dauD mein shaamil nahin thaa

jis ne insaan se mohabbat hi nahin ki 'taabish'
us ko kyaa ilm ki pindaar se aage kyaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain