ajnabi raaston par bhaTakte rahe — Tabish Mehdi

mire aibon ko ginvaayaa to sab ne
kisi ne meri gham-khvaari nahin ki

ye maanaa vo shajar sukhaa bahut hai
magar us mein abhi saayaa bahut hai

der tak mil ke rote rahe raah mein
un se baDhtaa huaa faaslaa aur main

paDosi ke makaan mein chhat nahin hai
makaan apne bahut unche na rakhnaa

agar phulon ki khvaahish hai to sun lo
kisi ki raah mein kaanTe na rakhnaa

takoge raah sahaaron ki tum miyaan kab tak
qadam uThaao ki taqdir intizaar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

tiraa visaal baDi chiiz hai magar ai dost
visaal ko miri duniyaa-e-aarzu na banaa

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

khvaab, ummid, tamannaaein, taalluq, rishte
jaan le lete hain aakhir ye sahaare saare

marte hain aarzu mein marne ki
maut aati hai par nahin aati