khvaab, ummid, tamannaaein, taalluq, rishte — Imran

rang ho raushni ho yaa khushbu
sab mein partav usi hasin ke hain

kyaa jaane shaakh-e-vaqt se kis vaqt gir paDun
maanind-e-barg-e-zard abhi Doltaa huun main

apne lahu mein zahr bhi khud gholtaa huun main
soz-e-darun kisi pe nahin kholtaa huun main

haar hi jiit hai aain-e-vafaa ki ru se
ye vo baazi hai jahaan jiit ke haare saare

vaqt har zakhm ko bhar detaa hai kuchh bhi kiije
yaad rah jaati hai halki si chubhan ki had tak

ajiib khauf kaa mausam hai in dinon 'imrran'
sugandh le ke havaa duur tak nahin jaati

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi