agar phulon ki khvaahish hai to sun lo — Tabish Mehdi

mire aibon ko ginvaayaa to sab ne
kisi ne meri gham-khvaari nahin ki

takoge raah sahaaron ki tum miyaan kab tak
qadam uThaao ki taqdir intizaar mein hai

ye maanaa vo shajar sukhaa bahut hai
magar us mein abhi saayaa bahut hai

der tak mil ke rote rahe raah mein
un se baDhtaa huaa faaslaa aur main

ajnabi raaston par bhaTakte rahe
aarzuon kaa ik qaafilaa aur main

paDosi ke makaan mein chhat nahin hai
makaan apne bahut unche na rakhnaa

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

shahr ho dasht-e-tamannaa ho ki dariyaa kaa safar
teri tasvir ko siine se lagaa rakkhaa hai

aagahi karb vafaa sabr tamannaa ehsaas
mere hi siine mein utre hain ye khanjar saare

aarzu hai suraj ko aaina dikhaane ki
raushni ki sohbat mein ek din guzaaraa hai

jism mein khvaahish na thi ehsaas mein kaanTaa na thaa
is tarah jaagaa ki jaise raat-bhar soyaa na thaa