hui surat na kuchh apni shifaa ki — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

mujh ko rote dekh kar paas aae vo tafhim ko
kyuun na dil se duun duaaein apne ghain o miim ko

dekho nigaah-e-shauq se meri taraf mujhe
ye muddaaa hai aur koi muddaaa nahin

miri jaanib ko karvaT le ke gar mujh se lipaT jaao
abhi dene lage miri tarah tum ko duaa karvaT

laae us but ko iltijaa kar ke
kufr TuuTaa khudaa khudaa kar ke

jaan tum par nisaar kartaa huun
main nahin jaantaa duaa kyaa hai

muddaaa izhaar se khultaa nahin hai
ye zabaan-e-be-zabaani aur hai