jab bhi ghairon ki inaayat dekhi — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

'ahd kartaa hai tiraa chaahne vaalaa tujh se
'umr-bhar sog manaaegaa tiri yaadon kaa

lazzat-e-maasiyat-e-ishq na puchh
khuld mein bhi ye balaa yaad aai

sitamgar jab koi taaza sitam ijaad karte hain
to bahr-imtihaan pahle hamin ko yaad karte hain

ham faraamosh ki faraamoshi
aur tum yaad umr bhar bhule