lazzat-e-maasiyat-e-ishq na puchh — Mirza Hadi Ruswa

Talnaa thaa mere paas se ai kaahili tujhe
kam-bakht tu to aa ke yahin Dher ho gai

hans ke kahtaa hai musavvir se vo ghaarat-gar-e-hosh
jaisi surat hai miri vaisi hi tasvir bhi ho

baad tauba ke bhi hai dil mein ye hasrat baaqi
de ke qasmein koi ik jaam pilaa de ham ko

usi par munhasir thi zindagi kyaa
ghaTaa jaataa hai dam zabt-e-fughaan se

apne surat-gar se puchhun main agar maqdur ho
kyaa banaayaa thaa mujhe tu ne miTaane ke liye

ham ko bhi kyaa kyaa maze ki daastaanein yaad thiin
lekin ab tamhid-e-zikr-e-dard-o-maatam ho gaiin

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

husn jalva dikhaa gayaa apnaa
ishq baiThaa rahaa udaas kahin

tum kaho tum bhi taDapte ho ta'alluq ke taiin
yaa mire hi dil-e-bismil ki ye bimaari hai