muskuraane kaa yahi andaaz thaa — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

mere khvaabon ke jharokon ko sajaate rahiye
na sahi vasl magar yaad to aate rahiye

shikva sayyaad kaa bejaa hai qafas mein bulbul
yaan tujhe aap tiraa tarz-e-fughaan laayaa hai

ab to kuchh bhi yaad nahin hai
ham ne tum ko chaahaa hogaa

itni fursat de ki rukhsat ho lein ai sayyaad ham
muddaton is baagh ke saaye mein the aazaad ham

ayaadat hoti jaati hai ibaadat hoti jaati hai
mire marne ki dekho sab ko aadat hoti jaati hai

jab yaad mein taDpein to mohabbat ko baDhaa dein
khud dard-e-mohabbat ki masihaai mohabbat