kifaayat se tumhein ham sochte hain — Usman Minai

ghamon par us ke kabhi e'tibaar mat karnaa
vo pyaaz kaaT ke aansu nikaal letaa hai

tumhaare chehre ki saari nasein tani hui hain
tumhaare haath mein kyaa aaina diyaa gayaa hai

koi bashar kabhi paani banaa nahin saktaa
khudaa ke hone kaa pahlaa subut paani hai

didaar ke sikke jo zaraa bhikh mein maange
to us ne kahaa jaao jumeraat ko aanaa

neze ki nok teraa tah-e-dil se shukriya
ab tak giraa nahin hai miraa sar zamin par

nishaan kyon DhunDhte ho ungliyon ke
qazaa aai thi dastaane pahan kar

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

vo motiyon se daant vo lambe siyaah baal
naqli thaa saaraa maal pata chal gayaa mujhe

kitne aalam guzar gae mujh par
tum ko sochaa thaa ek lamhe ko

tu mere saath nahin hai to sochtaa huun main
ki ab to tujh se bichhaDne kaa koi Dar bhi nahin

na duniyaa kaa huun main na kuchh fikr diin kaa
mohabbat ne rakkhaa na mujh ko kahin kaa