in aansuon se bhalaa meraa kyaa bhalaa hogaa — Waqar Manvi

bahut se gham chhupe honge hansi mein
zaraa in hansne vaalon ko TaTolo

dil mein jo mar jaae vo hai armaan
jo nikle armaan nahin hai

vaqaar' ai kaash meri umr mein shaamil na ki jaae
vo muddat haan vahi muddat jo guzri un ki furqat mein

kahaan milegi bhalaa is sitamgari ki misaal
taras bhi khaataa hai mujh par tabaah kar ke mujhe

hamaari zindagi kahne ki had tak zindagi hai bas
ye shiraaza bhi dekhaa jaae to barham hai barson se

gharib ko havas-e-zindagi nahin hoti
bas itnaa hai ki vo izzat se marnaa chaahtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ye to sochaa hi nahin us ko judaa karte hue
chun liyaa hai gham bhi khushiyon ko rihaa karte hue

baat peDon ki nahin, gham hai parindon kaa 'nadim'
ghonsle jin ke koi toD diyaa kartaa thaa

sun chuke jab haal meraa le ke angDaai kahaa
kis ghazab kaa dard zaalim tere afsaane mein thaa