dil mein ik dard uThaa aankhon mein aansu bhar aae — Wazir Ali Saba Lakhnavi

tu apne paanv ki mehndi chhuDaa ke de ai mahr
falak ko chaahiye ghaaza rukh-e-qamar ke liye

na paDhaa yaar ne ahvaal-e-shikasta meraa
khat ke purze kiye baazu-e-kabutar toDaa

khaak mein mujh ko milaa ke vo sanam kahtaa hai
apne allaah se jaa kar miri fariyaad karo

paayaa hai is qadar sukhan-e-sakht ne rivaaj
punjabi baat karte hain pashtu zabaan mein

kyaa banaayaa hai buton ne mujh ko
naam rakkhaa hai musalmaan meraa

ham rind-e-pareshaan hain maah-e-ramazaan hai
chamki hui in rozon mein vaaiz ki dukaan hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

aansuon mein mire kaandhe ko Dubone vaale
puchh to le ki mire jism kaa sahraa hai kahaan

ye zamzama tuyur-e-khush-aahang kaa nahin
hai naghma-sanj bulbul-e-rangin-navaa-e-qalb

jaan ghul chuki hai gham mein ik tan hai vo bhi mohmal
maani nahin hain bilkul mujh mein agar bayaan huun